الشاعر/ إسماعيل حسن
ريحة التراب
والله ياريحة التراب
شديتني للماضي البعيد
عبر الزمان
في اللا مكان
عبر البكون
جوه اللي كان
مشوار غريب
حفيان
وطيت جمر أم لهب
الروح تهيم
فوق النجوم
والفاني
.. مطمور في التراب
والله ياريحة التراب
كيفن يكون درب الوصول
لي ساحة ما شقاها زول
من دوني دونك
ألف باب
وكم حجاب
وكم ستور
مندلي يا ريحة التراب
أصلى مليت العذاب
جيتا خايد في الضباب
شوق ليالى الغربة
في أعماقي داب
الحنين
جوه جوفي
قصة ما شافت كتاب
الصغيرون..
بي شقاوة الدنيا يا ..يمه شاب
والله يا ريحة التراب
العطش يبس لهاتى
جيت أهاتى
جارى
لي موية الرهاب
والله ياريحة التراب
جيتا تعبان
داير ارقد داير أنوم
انسي نفسي
والشقى القاسيتو
فى وادي الهموم
داير ألولى النسمة
بي فرحة صغير كره السموم
والله ياريحة التراب
ريحة التراب. والله يا ريحة التراب
لازم أوصل مهما كان
أوعى.. ما توصيني كنا وكان زمان
الزمان يا أصلى ماليه أمان
ونحن في ساحاته
زى خيل الرهان
والله يا ريحة التراب
لازم أوصل مهما كان
حتى كان
سدت سواعد الليل
دروب الكون وما خلت مكان
حتى كان جار القدر
شداني فى قاع الزمان
مو ضلام الليل بشيلو
!!.. وبمشي لي فجر الأمان
يا سلاسل القدرة
ما برضي الهوان
بمشي فوق المستحيل
بقدل وبتبختر كمان
لازم أوصل
لي مشاتل ريدي
في أرض الحُنان
والله يا ريحة التراب
ليست هناك تعليقات:
إرسال تعليق